Atuatua Wangoguna'õ Fa'auri (Sinunõ/Mazmur 90:12)

Ikaoni ita sinunõ andre ba wangandrõ khõ Lowalangi ena’õ Ifahaõ ita ba wangerai bongida. Fehede da’e tenga ena’õ alio ahori ngaluoda we’aso ba gulidanõ andre, hiza i ena’õ so khõda dõdõ satuatua. Hana wa idõnisi ita wangandrõ da’e khõ Lowalangi? Fanema li ba da’e tesõndra ba ayati 1-2 ba 3-11 fõna nibasoda andre ma’õkhõ.

Ba ayati 1-2, ifaduhu’õ khõda sinunõ andre wa Lowalangi samõsa zi tobali nahia wolombase, sawatõda gõtõgõtõ wa’ara. Murasoi wa musõndra wa’ohahau dõdõ tenga bõrõ nahia ma hadia ia zi no tafa’anõ, hiza i bõrõ na sõkhi gamakhaitada ba khõ Lowalangi.

Itohugõ sinunõ andre wamasugi ba dõdõda wa ha gasagasa wekoli andre ba gulidanõ. Da’õ mbõrõ wa i’o’amaedolagõ wa’auri andre hulõ “gawugawu” ba hulõ “ndru’u”. Eluahania, ha Lowalangi samõsa zi lõ tebulõ, ba ya’ita niha no sambõ sibai fa’abõlõ, ba ha gasagasa wekolida andre tou ba gulidanõ (ayati 3-6). Ifasugi gõi ba dõdõda wa no niha sebua olalõwa manõ ita andre tanõ fõna Lowalangi (ayati 7-11), andrõ moguna so khõda wangidengide’õ.

Da’e fefu mbõrõ wa moguna ta’andrõ khõ Lowalangi ba wamahaõ ba ba wamasugi ba dõdõda wa si lõ ara wekolida andre ba gulidanõ. Hadia gohitõ dõdõ? Ena’õ tesõndra khõda dõdõ satuatua ba wanõrõda fekoli andre ba gulidanõ. Fa’atuatua sedõna iwa’õ khõda ya’ia da’õ fa’atuatua ba wangata’ufi Lowalangi, fa’atuatua ba wamaduhu’õ wa ha Lowalangi Zamatõrõ si lõ tebulõ, ba fa’atuatua ba wamo’õsi fa’auri andre tobali howuhowu ba zi tefasui. Andrõ alimagõ sibai niha na no arõrõ manõ ia ba zoya ngawalõ ba gulidanõ andre, ba taya ba dõdõnia wo’angerõnusi wa si lõ ara tõ wekolinia ba gulidanõ. Andrõ da ta’oguna’õ wa’auri andre ba wangata’ufi Lowalangi ba ba wamowua ya’ia ba zi tefasuida.

Tanõmõ wangerangera: Ha fatua so ita ba gulidanõ andre ba ha fatua abõlõ tola ta’oguna’õ wa’auri andre tobali famolakhõmi Lowalangi ba tobali ndrela howuhowu ba zi tefasuida.

(Pdt. Alokasih Gulo)